لاہور: شہر کے مختلف علاقوں میں خود کو سرکاری پرائس کنٹرول اہلکار ظاہر کر کے دکانداروں سے مبینہ طور پر رقم وصول کرنے والے تین افراد کو شہریوں نے پکڑ کر پولیس کے حوالے کر دیا۔
اطلاعات کے مطابق مرکزی ملزم، جس کی شناخت ارسلان اکمل کے نام سے ہوئی، اپنے دو ساتھیوں کے ہمراہ مختلف بازاروں میں جا کر خود کو تحصیل واہگہ سے تعلق رکھنے والا پرائس کنٹرول سپروائزر ظاہر کرتا تھا۔ ملزمان مبینہ طور پر سبزی فروشوں، ایل پی جی ڈیلرز، کریانہ اسٹورز اور دیگر کاروباری مراکز پر ریٹ لسٹ کی جانچ کے نام پر دکانداروں سے رقم طلب کرتے رہے۔
مقامی تاجروں کو ان افراد کی سرگرمیوں پر شبہ ہوا تو انہوں نے موقع پر ہی تینوں کو روک لیا اور متعلقہ پولیس کو اطلاع دے دی۔ پولیس موقع پر پہنچی اور ملزمان کو اپنی تحویل میں لے کر تھانے منتقل کر دیا۔
پولیس حکام کے مطابق ابتدائی معلومات کی بنیاد پر واقعے کی مختلف پہلوؤں سے تحقیقات کی جا رہی ہیں تاکہ یہ معلوم کیا جا سکے کہ آیا ملزمان کسی منظم گروہ کا حصہ تھے یا انفرادی طور پر کارروائیاں کر رہے تھے۔
حکام کا کہنا ہے کہ شواہد اور تفتیش مکمل ہونے کے بعد ملوث افراد کے خلاف قانون کے مطابق کارروائی کی جائے گی۔ پولیس نے شہریوں اور تاجروں کو بھی ہدایت کی ہے کہ کسی بھی شخص کو سرکاری اہلکار سمجھنے سے پہلے اس کا سرکاری شناختی کارڈ اور مجاز دستاویزات ضرور چیک کریں، اور مشکوک سرگرمی کی صورت میں فوری طور پر متعلقہ اداروں یا پولیس کو آگاہ کریں۔