رحیم یار خان میں ڈپٹی کمشنر ظہیر انور جپہ نے تحصیل خانپور کا دورہ کرتے ہوئے مختلف ترقیاتی منصوبوں کا جائزہ لیا۔ انہوں نے مجوزہ سپورٹس ایرینا، جاگنگ ٹریک اور ماڈل بازار کا معائنہ کیا، شہریوں سے ملاقات کی اور ترقیاتی کاموں سے متعلق ان کی تجاویز بھی حاصل کیں۔
ڈپٹی کمشنر ظہیر انور جپہ نے اسسٹنٹ کمشنر خانپور افضل سکھیرا کے ہمراہ تحصیل خانپور میں جاری اور مجوزہ ترقیاتی منصوبوں کا تفصیلی جائزہ لیا۔ دورے کے دوران سپورٹس ایرینا، جاگنگ ٹریک اور ماڈل بازار سمیت مختلف منصوبوں پر ہونے والی پیش رفت کے بارے میں متعلقہ افسران نے بریفنگ دی۔
ڈپٹی کمشنر نے مختلف مقامات پر موجود شہریوں سے براہِ راست گفتگو کرتے ہوئے ان کی آراء اور تجاویز سنیں اور متعلقہ محکموں کو عوامی سہولیات بہتر بنانے کے لیے ضروری ہدایات جاری کیں۔
اس موقع پر انہوں نے کہا کہ ضلعی انتظامیہ کی اولین ترجیح ترقیاتی منصوبوں کو مقررہ معیار اور وقت کے مطابق مکمل کرنا ہے تاکہ عوام ان کے ثمرات سے جلد مستفید ہو سکیں۔ ان کا کہنا تھا کہ نوجوانوں کے لیے کھیلوں کی جدید سہولیات کی فراہمی نہ صرف صحت مند سرگرمیوں کو فروغ دیتی ہے بلکہ مثبت معاشرتی ماحول کی تشکیل میں بھی اہم کردار ادا کرتی ہے۔
انہوں نے مزید کہا کہ جدید طرز کے ماڈل بازاروں کا قیام عوام کو معیاری اور منظم خریداری کی سہولیات فراہم کرنے کے لیے اہم اقدام ہے۔ اس مقصد کے حصول کے لیے متعلقہ محکموں اور تاجر برادری کو باہمی تعاون کے ساتھ اپنی ذمہ داریاں مؤثر انداز میں ادا کرنی چاہئیں تاکہ شہریوں کو بہترین سہولیات میسر آ سکیں۔