ویسٹ انڈیز کے خلاف دوسرے ٹیسٹ سے قبل قومی ٹیم میں اہم تبدیلیوں کا امکان
ویسٹ انڈیز کے خلاف جاری ٹیسٹ سیریز کے دوسرے میچ سے قبل پاکستان کرکٹ ٹیم کے ممکنہ کمبی نیشن پر غور جاری ہے، جبکہ پلیئنگ الیون میں متعدد اہم تبدیلیاں سامنے آنے کا امکان ظاہر کیا جا رہا ہے۔
ذرائع کے مطابق کپتان شان مسعود کمر کی انجری کے باعث نہ صرف جاری سیریز بلکہ آئندہ انگلینڈ کے دورے سے بھی باہر ہو گئے ہیں۔ ان کی عدم دستیابی کے بعد سلیکشن کمیٹی نے عبداللہ شفیق اور سعود شکیل کو دوبارہ اسکواڈ میں شامل کر لیا ہے تاکہ بیٹنگ لائن اپ کو مزید مضبوط بنایا جا سکے۔
عبداللہ شفیق اور سعود شکیل نے ٹیم کے ٹریننگ سیشن میں بھرپور حصہ لیا، جبکہ اویس ظفر بھی اسکواڈ کے ساتھ موجود ہیں۔ تاہم دوسرے ٹیسٹ میں تجربہ کار بیٹرز کو ترجیح دیے جانے کا امکان زیادہ بتایا جا رہا ہے۔
ٹیم مینجمنٹ بیٹنگ آرڈر میں بھی تبدیلی پر غور کر رہی ہے۔ ممکنہ حکمت عملی کے تحت عبداللہ شفیق کو تیسرے نمبر پر بیٹنگ کرائی جا سکتی ہے، جبکہ بابر اعظم کو ان کی پسندیدہ چوتھی پوزیشن پر برقرار رکھنے کی تجویز زیر غور ہے۔
ذرائع کا کہنا ہے کہ ٹیم سات اسپیشلسٹ بیٹرز کے ساتھ میدان میں اترنے کے آپشن کا بھی جائزہ لے رہی ہے، جس کی صورت میں سعود شکیل کی پلیئنگ الیون میں واپسی کے امکانات مزید روشن ہو سکتے ہیں۔
بولنگ شعبے میں بھی رد و بدل متوقع ہے۔ پہلے ٹیسٹ میں پاکستانی فاسٹ بولرز کی رفتار ویسٹ انڈیز کے پیسرز کے مقابلے میں کم رہی، جس کے بعد نوجوان فاسٹ بولر عبید شاہ کو دوسرے ٹیسٹ میں موقع دیے جانے کا امکان ظاہر کیا جا رہا ہے۔
پچ کی صورتحال کو مدنظر رکھتے ہوئے ٹیم انتظامیہ ایک اضافی فاسٹ بولر کھلانے یا اسپن اٹیک میں کمی کر کے بیٹنگ لائن کو مزید مضبوط بنانے کے مختلف آپشنز پر بھی غور کر رہی ہے۔ حتمی پلیئنگ الیون کا اعلان میچ سے قبل ٹیم مینجمنٹ کی مشاورت کے بعد کیا جائے گا۔