پاکستان سپر لیگ (پی ایس ایل) کے بارہویں ایڈیشن کے شیڈول اور فارمیٹ کے حوالے سے اہم پیش رفت سامنے آئی ہے۔ پاکستان کرکٹ بورڈ (پی سی بی) اور فرنچائز مالکان کے درمیان ہونے والی ورچوئل مشاورت میں ٹورنامنٹ کے انعقاد کے لیے دو مختلف ونڈوز پر غور کیا گیا، جبکہ مستقبل میں مقابلوں کو مزید دلچسپ بنانے کے لیے “سپر سکسز” مرحلے کی تجویز بھی زیر بحث آئی۔
ذرائع کے مطابق اجلاس میں فروری، مارچ 2027 اور اپریل، مئی 2027 کی ونڈوز کے فوائد اور ممکنہ چیلنجز کا تفصیلی جائزہ لیا گیا۔ شرکا نے اس بات پر اتفاق کیا کہ حتمی فیصلہ کھلاڑیوں کی دستیابی، بین الاقوامی کرکٹ کیلنڈر، دیگر عالمی لیگز، اسپانسرشپ اور موسم جیسے عوامل کو مدنظر رکھتے ہوئے کیا جائے گا۔
اجلاس میں بتایا گیا کہ اگر لیگ فروری اور مارچ میں منعقد کی جاتی ہے تو متعدد عالمی معیار کے کھلاڑی دستیاب ہو سکتے ہیں، کیونکہ اس دوران بھارتی لیگ سے براہِ راست تصادم نہیں ہوگا۔ تاہم اسی عرصے میں دیگر ٹی20 لیگز اور رمضان المبارک کی وجہ سے شیڈولنگ کے بعض مسائل سامنے آ سکتے ہیں۔
دوسری جانب اپریل اور مئی کی ونڈو کے حوالے سے رائے دی گئی کہ اگرچہ اس دوران انڈین پریمیئر لیگ (آئی پی ایل) جاری ہوتی ہے، تاہم بعض بین الاقوامی کرکٹرز دستیاب رہ سکتے ہیں۔ اس کے باوجود شدید گرمی، تعلیمی امتحانات اور دیگر انتظامی عوامل کو بھی اہم چیلنج قرار دیا گیا۔
اجلاس میں فرنچائز مالکان نے کھلاڑیوں کی ریٹینشن اور آئندہ پلیئر ڈرافٹ یا آکشن کو معمول سے پہلے منعقد کرنے کی تجویز بھی پیش کی، تاکہ ٹیموں کو زیادہ معیاری غیر ملکی کھلاڑی حاصل کرنے کا موقع مل سکے۔ بعض مالکان نے سیلری کیپ پر نظرثانی کا مطالبہ کرتے ہوئے مؤقف اختیار کیا کہ بڑھتے ہوئے اخراجات سرمایہ کاروں پر اضافی مالی دباؤ ڈال رہے ہیں۔
ذرائع کے مطابق اجلاس میں پی ایس ایل کے فارمیٹ میں ممکنہ تبدیلی پر بھی تبادلہ خیال کیا گیا۔ اس سلسلے میں “سپر سکسز” مرحلہ متعارف کرانے کی تجویز سامنے آئی، جس کے تحت لیگ مرحلے کے بعد سرفہرست ٹیموں کے درمیان مزید مقابلے کرائے جا سکتے ہیں۔ تاہم اس تجویز پر عمل درآمد کو مالی اور انتظامی معاملات سے مشروط قرار دیا گیا ہے۔
اجلاس کے دوران ایک بڑے تجارتی شراکت دار کی جانب سے واجبات کی بروقت ادائیگی نہ ہونے کا معاملہ بھی زیر بحث آیا۔ شرکا نے اس بات پر زور دیا کہ مالی ذمہ داریوں کی بروقت ادائیگی لیگ کے استحکام کے لیے ضروری ہے اور کسی بھی اسٹیک ہولڈر کے لیے الگ معیار نہیں ہونا چاہیے۔ اس حوالے سے بورڈ نے معاملہ جلد نمٹانے کی یقین دہانی بھی کرائی۔
ایک تجویز یہ بھی زیر غور آئی کہ اگر کوئی ادارہ فرنچائز کی ملکیت رکھنے کے ساتھ ساتھ دیگر تجارتی معاہدوں کا بھی حصہ ہو اور اپنی مالی ذمہ داریاں پوری نہ کرے تو متعلقہ واجبات اس کی فرنچائز فیس سے ایڈجسٹ کرنے کا طریقہ کار وضع کیا جائے، تاکہ دیگر ٹیموں کے مالی مفادات محفوظ رہیں۔
ذرائع کے مطابق پی سی بی نے اجلاس کے دوران فرنچائز مالکان کو پاکستان اور انگلینڈ کے درمیان لارڈز میں شیڈول ٹیسٹ میچ دیکھنے کی دعوت بھی دی اور ان کے سفری و رہائشی اخراجات برداشت کرنے کی پیشکش کی۔
اجلاس میں قومی کرکٹ ٹیم کی حالیہ کارکردگی پر بھی کھل کر گفتگو ہوئی۔ بعض فرنچائز نمائندوں نے اس بات پر زور دیا کہ پاکستان ٹیم کی بین الاقوامی سطح پر مضبوط کارکردگی ہی پی ایس ایل کی تجارتی اور برانڈ ویلیو میں اضافے کی ضمانت بن سکتی ہے۔ انہوں نے قومی ٹیم کے ڈھانچے، ہائی پرفارمنس پروگرام، کوچنگ سسٹم اور ٹیلنٹ ڈویلپمنٹ پر بھی سوالات اٹھاتے ہوئے اصلاحات کا مطالبہ کیا۔
کرکٹ تجزیہ کاروں کے مطابق پی ایس ایل 12 کے شیڈول، فارمیٹ اور مالیاتی ڈھانچے سے متعلق کیے جانے والے فیصلے مستقبل میں لیگ کی مسابقت، بین الاقوامی کشش، کھلاڑیوں کی دستیابی اور کاروباری کامیابی پر نمایاں اثرات مرتب کر سکتے ہیں، اسی لیے پی سی بی آئندہ چند ہفتوں میں تمام تجاویز کا جائزہ لینے کے بعد حتمی حکمت عملی کا اعلان کرے گا۔