چودھری شافع نے گجرات میں سروس موڑ فلائی اوور کا افتتاح کر دیا

گجرات میں نئے تعمیر شدہ فلائی اوور کا افتتاح صوبائی وزیر صنعت و تجارت چودھری شافع حسین نے ایک چینی وفد کے ہمراہ کیا۔ تقریب کے دوران بتایا گیا کہ تقریباً ایک کلومیٹر طویل اس منصوبے پر 2 ارب 46 کروڑ روپے سے زائد لاگت آئی۔

اس موقع پر چودھری شافع حسین نے کہا کہ فلائی اوور پر جدید اسٹریٹ لائٹس کی تنصیب کا عمل آئندہ چند ہفتوں میں مکمل کر لیا جائے گا۔ انہوں نے بتایا کہ شہر میں نکاسی آب کے نظام کو مؤثر بنانے کے لیے بھی مختلف ترقیاتی منصوبوں پر کام جاری ہے، جبکہ سمال انڈسٹریل اسٹیٹ کے لیے مطلوبہ فنڈز فراہم کر دیے گئے ہیں۔

انہوں نے مزید کہا کہ سیرامکس صنعت سے نکلنے والے فضلے کو محفوظ انداز میں تلف کرنے کے لیے خصوصی ٹریٹمنٹ پلانٹ لگایا جا رہا ہے۔ اس کے علاوہ سمال انڈسٹریل اسٹیٹ کی عمارت کی مرمت اور خوبصورتی بڑھانے کا کام بھی تیزی سے جاری ہے۔

صوبائی وزیر کے مطابق حکومت شہری سہولیات میں بہتری اور صنعتی ترقی کے لیے عملی اقدامات کر رہی ہے، جبکہ گجرات کی مجموعی ترقی کو بھی ترجیحی بنیادوں پر آگے بڑھایا جا رہا ہے۔