نواب ولی محمد میں جسقم کا احتجاج، مختلف عوامی مسائل پر مطالبات پیش
نواب ولی محمد میں جسقم کی اپیل پر کارکنوں نے پریس کلب کے سامنے احتجاجی مظاہرہ کیا، جس میں بڑی تعداد میں کارکنان اور مقامی افراد نے شرکت کی۔
مظاہرے کے دوران غلام شبیر سنگراہ، اعجاز علی خاصخیلی، شیر محمد بگھیو، میر محمد سنگراہ، عبدالغفور سنگراہ اور دیگر رہنماؤں نے میڈیا سے گفتگو کرتے ہوئے کہا کہ صوبے میں لاپتا ہونے والی خواتین اور بچیوں کے مقدمات کو فوری بنیادوں پر حل کیا جانا چاہیے۔ انہوں نے پریا کماری، اجالا سولنگی اور فیصلہ سرکی سمیت دیگر لاپتا افراد کی بازیابی کے لیے مؤثر اور تیز رفتار اقدامات کا مطالبہ کیا۔
رہنماؤں نے اپنے خطاب میں سندھ کے آبی وسائل سے متعلق خدشات کا بھی اظہار کیا۔ ان کا کہنا تھا کہ دریائے سندھ کے پانی کی تقسیم سے متعلق فیصلوں میں سندھ کے مفادات کا مکمل تحفظ کیا جائے اور ایسے اقدامات سے گریز کیا جائے جن سے صوبے کی زراعت، ماحول اور مقامی آبادی متاثر ہو۔
مقررین نے یہ بھی کہا کہ منشیات کی دستیابی نوجوان نسل کے لیے سنگین خطرہ بنتی جا رہی ہے۔ ان کے مطابق منشیات کی روک تھام کے لیے قانون نافذ کرنے والے اداروں کو مزید مؤثر کارروائیاں کرنی چاہئیں تاکہ اس غیرقانونی کاروبار کا خاتمہ ممکن بنایا جا سکے۔
احتجاج کے اختتام پر مظاہرین نے مطالبہ کیا کہ لاپتا افراد کی بازیابی، منشیات فروش عناصر کے خلاف بلاامتیاز کارروائی اور عوامی مسائل کے حل کے لیے متعلقہ ادارے فوری اور مؤثر اقدامات کریں۔