فیفا ورلڈ کپ کے دوران سیکیورٹی میں بڑی خامی سامنے آ گئی، متعدد شائقین بغیر ٹکٹ اسٹیڈیم میں داخل ہونے میں کامیاب ہو گئے۔
فیفا ورلڈ کپ 2026 کے ایک میچ کے دوران سیکیورٹی انتظامات پر سوالات اٹھ گئے، جب کچھ شائقین کے مبینہ طور پر بغیر ٹکٹ اسٹیڈیم میں داخل ہونے کی اطلاعات سامنے آئیں۔
برطانوی میڈیا رپورٹس کے مطابق ڈیلاس میں انگلینڈ اور کروشیا کے میچ کے دوران چند افراد کے ٹکٹ چیکنگ کے بغیر اسٹیڈیم میں داخل ہونے کا دعویٰ کیا گیا ہے۔
عینی شاہدین کا کہنا ہے کہ اسٹیڈیم کے داخلی پوائنٹس پر کچھ کمزوریاں نظر آئیں، جس کا فائدہ اٹھاتے ہوئے بعض افراد اندر پہنچ گئے۔ ایک شائق کے مطابق چیکنگ پوائنٹس پر موجود عملہ محدود تھا اور ہر شخص کی سخت جانچ نہیں کی جا رہی تھی۔
کچھ تماشائیوں نے یہ بھی کہا کہ داخلے کے دوران سیکیورٹی اتنی سخت نہیں تھی جتنی توقع کی جا رہی تھی، جس کی وجہ سے چند افراد بغیر مکمل اسکیننگ کے بھی اندر داخل ہوتے دکھائی دیے۔
اگرچہ مقابلے سے قبل سخت سیکیورٹی اقدامات اور اضافی اہلکاروں کی تعیناتی کا دعویٰ کیا گیا تھا، تاہم اس واقعے کے بعد انتظامی کارکردگی پر بحث شروع ہو گئی ہے۔
دوسری جانب فیفا حکام کا کہنا ہے کہ انہیں اس حوالے سے ابھی تک کوئی واضح ثبوت نہیں ملا، جبکہ مقامی انتظامیہ نے بھی معاملے کی مکمل جانچ کی بات کی ہے۔
واقعے کے بعد ٹکٹ خرید کر آنے والے شائقین میں بھی بے چینی اور تشویش دیکھی گئی۔
