ایران جنگ کے اخراجات کی بحالی کے لیے پینٹاگون کو 80 ارب ڈالر درکار ہیں۔
امریکی محکمہ دفاع (پینٹاگون) نے کانگریس کے ارکان کو آگاہ کیا ہے کہ ایران سے متعلق حالیہ جنگی صورتحال اور اس کے بعد کے اخراجات کو پورا کرنے کے لیے تقریباً 80 ارب ڈالر کی اضافی مالی ضرورت پیش آ سکتی ہے۔
بین الاقوامی میڈیا رپورٹس کے مطابق یہ بات امریکی اخبار وال اسٹریٹ جرنل کی رپورٹ میں سامنے آئی، جسے رائٹرز نے بھی اپنی رپورٹنگ میں نقل کیا ہے۔
رپورٹ میں بتایا گیا ہے کہ نائب وزیر دفاع اسٹیفن فینبرگ نے قانون سازوں سے ملاقاتوں کے دوران مؤقف اختیار کیا کہ فوجی کارروائیوں، تعیناتیوں، اسلحہ و گولہ بارود کے استعمال اور دوبارہ ذخیرہ کرنے کے باعث دفاعی بجٹ پر اضافی دباؤ بڑھ گیا ہے۔
ذرائع کے مطابق جدید ہتھیاروں اور میزائل سسٹمز کے ذخائر میں کمی واقع ہوئی ہے، جس کی بحالی کے لیے بڑے پیمانے پر فنڈز درکار ہوں گے تاکہ امریکی دفاعی تیاری برقرار رکھی جا سکے۔
رپورٹس کے مطابق ایران سے متعلق کشیدگی کے آغاز کے بعد امریکی دفاعی اخراجات میں نمایاں اضافہ دیکھا گیا ہے۔ ابتدائی طور پر ان اخراجات کا تخمینہ تقریباً 25 ارب ڈالر لگایا گیا تھا، تاہم بعد کی رپورٹس میں اس میں مزید اضافہ ظاہر کیا گیا۔
کانگریس میں اس معاملے پر سیاسی بحث بھی جاری ہے، جہاں کچھ ارکان اضافی فنڈنگ سے قبل جنگ کے مقاصد اور قانونی جواز پر مزید وضاحت کا مطالبہ کر رہے ہیں، جبکہ دیگر قانون ساز قومی سلامتی کو مدنظر رکھتے ہوئے فوری مالی منظوری کی حمایت کر رہے ہیں۔
