نیویارک: کینیڈا میں جاری وسیع جنگلاتی آگ کے نتیجے میں اٹھنے والا دھواں امریکا کے شمال مشرقی علاقوں تک پہنچ گیا ہے، جس سے نیویارک اور نیو جرسی میں فضائی معیار متاثر ہوا ہے۔ حکام نے آلودہ فضا کے پیشِ نظر شہریوں کو احتیاطی تدابیر اختیار کرنے کی ہدایت جاری کر دی ہے۔
سرکاری اداروں کے مطابق فضائی آلودگی میں اضافے کے باعث بچوں، بزرگوں، سانس اور دل کے امراض میں مبتلا افراد کو غیر ضروری طور پر گھروں سے باہر نہ نکلنے اور سخت جسمانی مشقت سے گریز کرنے کا مشورہ دیا گیا ہے۔ صحت کے ماہرین کا کہنا ہے کہ دھوئیں سے بھرپور فضا حساس افراد کے لیے طبی مسائل پیدا کر سکتی ہے۔
اسی دوران 19 جولائی کو نیویارک۔نیو جرسی اسٹیڈیم میں اسپین اور ارجنٹینا کے درمیان شیڈول فیفا ورلڈ کپ فائنل پر بھی توجہ مرکوز ہو گئی ہے، جہاں 80 ہزار سے زائد شائقین کی آمد متوقع ہے۔ اگرچہ منتظمین نے تاحال میچ کے شیڈول یا مقام میں کسی قسم کی تبدیلی کا اعلان نہیں کیا، تاہم فضائی آلودگی کی صورتحال کے باعث اس حوالے سے خدشات کا اظہار کیا جا رہا ہے۔
دونوں ٹیموں کی تیاریاں معمول کے مطابق جاری ہیں۔ اسپین کی ٹیم نیو جرسی پہنچنے کے بعد کھلے میدان میں تربیتی سیشن مکمل کر چکی ہے، جبکہ ارجنٹینا کی ٹیم بھی مقررہ شیڈول کے مطابق اپنی پریکٹس جاری رکھنے کی منصوبہ بندی کر رہی ہے۔
فضائی آلودگی کے اثرات دیگر کھیلوں پر بھی دیکھنے میں آئے ہیں۔ نیشنل ویمنز ساکر لیگ کے ایک میچ میں کھلاڑیوں کی صحت کے تحفظ کے لیے ہر ہاف کے دوران اضافی وقفے دیے گئے، جبکہ بعض کھلاڑیوں نے خراب فضائی معیار میں مقابلہ کرانے پر تشویش کا اظہار کیا۔
دوسری جانب شکاگو میں میجر لیگ ساکر کا ایک میچ بھی آلودہ فضا کے باعث ملتوی کر دیا گیا، جس سے واضح ہوتا ہے کہ موجودہ موسمی صورتحال کھیلوں کی سرگرمیوں پر بھی اثر انداز ہو رہی ہے۔
محکمہ موسمیات کا کہنا ہے کہ آئندہ چند روز کے دوران متوقع بارشوں سے فضاء میں موجود دھواں کم ہونے اور ہوا کے معیار میں بہتری آنے کا امکان ہے،