فیفا ورلڈ کپ: فاتح ٹیم کو پہلی بار خصوصی چیمپئن رنگز دینے کا فیصلہ
فیفا نے آئندہ ورلڈ کپ فائنل کے موقع پر ایک نئی روایت متعارف کرانے کا اعلان کیا ہے، جس کے تحت پہلی مرتبہ چیمپئن بننے والی ٹیم کو ورلڈ کپ ٹرافی کے ساتھ خصوصی چیمپئن شپ رنگز بھی پیش کی جائیں گی۔ اس اقدام کا مقصد عالمی چیمپئن ٹیم کی کامیابی کو ایک منفرد اور یادگار انداز میں خراجِ تحسین پیش کرنا ہے۔
فیفا کے مطابق فائنل جیتنے والی ٹیم کے کھلاڑیوں، کوچنگ اسٹاف اور دیگر متعلقہ اراکین کے لیے مجموعی طور پر 30 خصوصی رنگز تیار کی گئی ہیں۔ ہر رنگ کو منفرد ڈیزائن دیا گیا ہے، جس میں ورلڈ کپ ٹرافی کی علامتی شکل، خصوصی نقش و نگار اور یادگاری کندہ کاری شامل ہوگی۔
یہ روایت امریکی کھیلوں، خصوصاً این ایف ایل کے سپر باؤل میں کئی برسوں سے مقبول ہے، جہاں چیمپئن ٹیم کو ٹرافی کے ساتھ خصوصی رنگز بھی دی جاتی ہیں۔ اب پہلی بار فیفا نے بھی اس روایت کو عالمی فٹبال کے سب سے بڑے ایونٹ کا حصہ بنانے کا فیصلہ کیا ہے۔
فیفا نے مزید بتایا کہ شائقین کے لیے بھی محدود تعداد میں 1996 یادگاری رنگز تیار کی جائیں گی، جو کلیکٹرز ایڈیشن کے طور پر فروخت کی جائیں گی۔ ان رنگز کا مقصد مداحوں کو ٹورنامنٹ کی یادگار سے جوڑنا اور عالمی فٹبال کی تاریخ کے اس نئے باب کو محفوظ بنانا ہے۔
ادھر عالمی میڈیا رپورٹس کے مطابق امریکی صدر ڈونلڈ ٹرمپ بھی فائنل میچ دیکھنے اسٹیڈیم پہنچیں گے اور متوقع طور پر اختتامی تقریب میں فاتح ٹیم کو ورلڈ کپ ٹرافی اور خصوصی چیمپئن رنگز پیش کریں گے۔ دلچسپ امر یہ ہے کہ ٹرمپ اس سے قبل ٹورنامنٹ کے کسی بھی میچ میں شریک نہیں ہوئے، حتیٰ کہ میزبان ملک امریکا کے مقابلے بھی انہوں نے اسٹیڈیم میں جا کر نہیں دیکھے۔
سیاسی اور کھیلوں کے حلقوں میں فیفا کے صدر جیانی انفانٹینو اور ڈونلڈ ٹرمپ کے تعلقات بھی مختلف مواقع پر زیرِ بحث رہے ہیں۔ بعض مبصرین نے ماضی میں ٹورنامنٹ کے چند فیصلوں پر سوالات اٹھائے، تاہم فیفا کا مؤقف ہے کہ تمام انتظامی اور انضباطی فیصلے مقررہ قوانین اور ضوابط کے مطابق کیے جاتے ہیں۔
فٹبال ماہرین کے مطابق چیمپئن رنگز کا آغاز ورلڈ کپ کی تاریخ میں ایک نئی روایت ثابت ہو سکتا ہے، جو مستقبل میں عالمی چیمپئن بننے والی ٹیموں کے لیے ایک اور اعزاز کی حیثیت اختیار کر لے گا۔ اس اقدام سے نہ صرف کھلاڑیوں کی کامیابی کو مزید یادگار بنایا جائے گا بلکہ شائقین کے لیے بھی ورلڈ کپ کی تاریخی اہمیت میں اضافہ ہوگا۔