چار میچوں پر مشتمل دوطرفہ ہاکی سیریز میں شرکت کے لیے جنوبی کوریا کی قومی ہاکی ٹیم پاکستان پہنچ گئی۔ اسلام آباد انٹرنیشنل ایئرپورٹ پر پاکستان سپورٹس بورڈ اور وزارت بین الصوبائی رابطہ کے حکام نے مہمان ٹیم کا خیرمقدم کیا۔
دورہ کرنے والے وفد میں 24 کھلاڑی اور آفیشلز شامل ہیں، جو پاکستان کے خلاف شیڈول سیریز میں حصہ لیں گے۔ اس سیریز کو دونوں ممالک کے درمیان کھیلوں کے تعلقات کو بڑھانے کی اہم کوشش قرار دیا جا رہا ہے۔
سیریز کے تمام مقابلے اسلام آباد کے نصیر بندہ ہاکی اسٹیڈیم میں کھیلے جائیں گے۔ شیڈول کے مطابق پہلا میچ 30 جولائی، دوسرا یکم اگست، تیسرا 4 اگست جبکہ چوتھا اور آخری میچ 7 اگست کو منعقد ہوگا۔
دورے کے دوران دونوں ٹیموں کے لیے مشترکہ تربیتی سیشنز بھی رکھے گئے ہیں، جہاں کھلاڑی جدید تکنیکی مہارتوں پر کام کرنے کے ساتھ ایک دوسرے کے تجربات سے بھی فائدہ اٹھائیں گے۔ ان کیمپوں کا مقصد مقابلہ جاتی صلاحیت میں اضافہ اور کھیل کے معیار کو مزید بہتر بنانا ہے۔
کھیلوں کے حکام کا کہنا ہے کہ اس سیریز سے نہ صرف پاکستان اور جنوبی کوریا کے درمیان اسپورٹس تعاون کو تقویت ملے گی بلکہ قومی ہاکی ٹیم کو بین الاقوامی معیار کے مقابلوں سے قبل اپنی تیاریوں کو مزید مؤثر بنانے کا موقع بھی حاصل ہوگا۔