موسم گرم اور خشک

محکمہ موسمیات کے مطابق اس وقت ملک کے شمالی اور بالائی علاقوں پر ایک کمزور مغربی ہواوں کا سلسلہ موجود ہے جو آئندہ 24 گھنٹوں تک برقرار رہنے کا امکان ہے، جبکہ ملک کے دیگر حصوں میں گرم اور خشک ہوائیں غالب ہیں۔

جمعہ کے روز بیشتر علاقوں میں موسم گرم اور خشک رہنے کی توقع ہے۔ تاہم دوپہر کے بعد خیبرپختونخوا، کشمیر، گلگت بلتستان اور بالائی پنجاب کے بعض حصوں میں جزوی طور پر مطلع ابر آلود ہو سکتا ہے، جہاں تیز ہواؤں، آندھی اور گرج چمک کے ساتھ چند مقامات پر بارش کا امکان ظاہر کیا گیا ہے۔ بالائی خیبرپختونخوا اور کشمیر میں کہیں کہیں تیز بارش اور ژالہ باری بھی متوقع ہے۔

ہفتے کے روز بھی ملک کے زیادہ تر علاقوں میں موسم گرم اور خشک رہے گا، جبکہ بالائی خیبرپختونخوا، کشمیر اور گلگت بلتستان میں مطلع جزوی طور پر ابر آلود رہنے کے ساتھ ساتھ تیز ہواؤں اور گرج چمک کے ساتھ بارش کا امکان برقرار رہے گا۔

گزشتہ 24 گھنٹوں کے دوران اسلام آباد، پنجاب، کشمیر، گلگت بلتستان اور خیبرپختونخوا کے چند مقامات پر تیز ہواؤں اور گرج چمک کے ساتھ بارش ریکارڈ کی گئی، جبکہ ملک کے دیگر علاقوں میں موسم گرم اور خشک رہا۔

سب سے زیادہ بارش پنجاب کے مختلف شہروں میں ریکارڈ کی گئی جن میں چکوال 48 ملی میٹر سرِفہرست رہا۔ اسلام آباد، راولپنڈی، جہلم، سیالکوٹ، لاہور، گجرات، شیخوپورہ اور دیگر شہروں میں بھی بارش ہوئی۔ کشمیر کے مختلف علاقوں میں بھی نمایاں بارش ریکارڈ کی گئی، جبکہ خیبرپختونخوا اور گلگت بلتستان کے متعدد مقامات پر ہلکی سے درمیانی بارش رپورٹ ہوئی۔

گزشتہ روز ملک کے کئی شہروں میں درجہ حرارت انتہائی بلند رہا، جن میں سبی میں 49 ڈگری سینٹی گریڈ، شہید بینظیر آباد اور دادو میں 48 ڈگری جبکہ سکرنڈ اور تربت میں 47 ڈگری سینٹی گریڈ ریکارڈ کیا گیا۔