اوکاڑہ: ریسکیو 1122 کی بروقت امداد، دل کا دورہ پڑنے والے مریض کی جان بچا لی
اوکاڑہ کے نواحی علاقے 39/3R اڈہ میں دل کا دورہ پڑنے سے ایک 50 سالہ شخص کی حالت تشویشناک ہونے کی اطلاع پر ریسکیو 1122 کی ٹیم نے فوری کارروائی کرتے ہوئے بروقت طبی امداد فراہم کی۔
ریسکیو حکام کے مطابق اطلاع ملتے ہی امدادی اہلکار چند ہی لمحوں میں موقع پر پہنچ گئے، جہاں متاثرہ شخص بے ہوشی کی حالت میں موجود تھا۔ ابتدائی طبی معائنے کے بعد ریسکیورز نے فوری طور پر کارڈیو پلمونری ریسیسیٹیشن (CPR) کا عمل شروع کیا۔
ریسکیو ٹیم نے تقریباً 15 منٹ تک مسلسل سی پی آر جاری رکھی، جس کے نتیجے میں مریض کی دل کی دھڑکن اور سانس بحال ہو گئی۔ کامیاب ابتدائی طبی امداد کے بعد متاثرہ شخص کو مزید علاج کے لیے ڈسٹرکٹ ہیڈکوارٹر (ڈی ایچ کیو) سٹی اسپتال اوکاڑہ منتقل کر دیا گیا۔
ریسکیو 1122 کے حکام نے بتایا کہ ہنگامی حالات میں بروقت طبی امداد اور درست طریقے سے سی پی آر کی فراہمی قیمتی جانیں بچانے میں اہم کردار ادا کرتی ہے۔ انہوں نے شہریوں کو بھی بنیادی طبی امداد، خصوصاً سی پی آر کی تربیت حاصل کرنے کی ضرورت پر زور دیا تاکہ ایمرجنسی کی صورت میں فوری مدد فراہم کی جا سکے۔