عالمی معاشی غیر یقینی صورتحال اور سرمایہ کاروں کے محتاط رویے کے باعث عالمی اور مقامی صرافہ بازاروں میں سونے کی قیمتوں میں کمی کا رجحان برقرار ہے۔ ماہرین کے مطابق مشرقِ وسطیٰ میں کشیدگی، خام تیل کی قیمتوں میں اتار چڑھاؤ اور امریکی فیڈرل ریزرو کے آئندہ اجلاس سے قبل شرحِ سود سے متعلق توقعات نے قیمتی دھاتوں کی مارکیٹ کو متاثر کیا ہے۔
بین الاقوامی بلین مارکیٹ میں فی اونس سونے کی قیمت 46 ڈالر کم ہو کر 4,050 ڈالر تک آ گئی، جس کے اثرات پاکستان کی مقامی صرافہ مارکیٹ پر بھی دیکھنے میں آئے۔
مقامی مارکیٹ میں فی تولہ سونے کی قیمت 4,600 روپے کمی کے بعد 427,436 روپے ریکارڈ کی گئی، جبکہ 10 گرام سونے کی قیمت 3,944 روپے کم ہو کر 366,457 روپے پر پہنچ گئی۔
مارکیٹ تجزیہ کاروں کا کہنا ہے کہ عالمی مالیاتی پالیسی، ڈالر کی قدر، خام تیل کی قیمتوں اور جغرافیائی سیاسی صورتحال میں آنے والی تبدیلیاں آئندہ دنوں میں بھی سونے کی قیمتوں پر اثرانداز ہو سکتی ہیں، اسی لیے سرمایہ کار عالمی معاشی پیش رفت پر گہری نظر رکھے ہوئے ہیں۔