واشنگٹن: امریکا میں ایک طالب علم کی غیرمعمولی تعلیمی کارکردگی کے بعد گریڈ پوائنٹ ایوریج (GPA) کے موجودہ نظام پر نظرثانی کی بحث زور پکڑ گئی ہے۔ غیر معمولی اسکور حاصل کرنے کے بعد تعلیمی اداروں میں گریڈنگ کے طریقۂ کار کو مزید متوازن بنانے کی تجاویز زیر غور ہیں۔
فلوریڈا کے اسٹین برینر ہائی اسکول سے فارغ التحصیل ہونے والے طالب علم ویبھاو بھاسکر نے 11.99 جی پی اے حاصل کرکے ایک نیا ریکارڈ قائم کیا۔ اس سے قبل ریاست میں سب سے زیادہ 11.84 جی پی اے ریکارڈ کیا گیا تھا، جسے انہوں نے پیچھے چھوڑ دیا۔
رپورٹس کے مطابق اس کامیابی میں ہِلزبرو کاؤنٹی کی گریڈنگ پالیسی نے اہم کردار ادا کیا، جہاں ایڈوانسڈ پلیسمنٹ (AP) اور ڈوئل انرولمنٹ پروگرامز میں حصہ لینے والے طلبہ کو اضافی ویٹڈ پوائنٹس دیے جاتے ہیں، جس سے مجموعی جی پی اے روایتی 4.0 پیمانے سے کہیں زیادہ ہو سکتا ہے۔
ویبھاو بھاسکر نے اپنی تعلیم کے دوران 20 ایڈوانسڈ پلیسمنٹ کورسز مکمل کیے، جبکہ یونیورسٹی آف فلوریڈا کے آن لائن ڈوئل انرولمنٹ پروگرام کے ذریعے 24 کالج کورسز بھی کامیابی سے پاس کیے۔ یہ کریڈٹس ایک ایسوسی ایٹ ڈگری کے تقاضے پورے کرنے کے لیے بھی کافی تھے۔
میڈیا سے گفتگو میں طالب علم نے بتایا کہ انہوں نے ابتدا ہی سے بہترین تعلیمی مقام حاصل کرنے کا ہدف مقرر کر رکھا تھا۔ اسی مقصد کے تحت انہوں نے مشکل مضامین کا انتخاب کیا، دستیاب تعلیمی مواقع سے بھرپور فائدہ اٹھایا اور اپنی استعداد کو مسلسل بہتر بنانے کی کوشش جاری رکھی۔