یونان سے سامنے آنے والی ایک نئی تصویر نے شہزادی بیٹریس اور ان کے شوہر ایڈوارڈو میپیلی موزی کی علیحدگی سے متعلق گردش کرنے والی افواہوں کی شدت کو کسی حد تک کم کر دیا ہے۔
یہ تصویر آرٹ کیوریٹر الیکی لیمپروپولوس نے سوشل میڈیا پر شیئر کی، جس میں شاہی جوڑے کو ایتھنز میں ایک ساتھ خوشگوار انداز میں دیکھا جا سکتا ہے۔ تصویر منظر عام پر آنے کے بعد سوشل میڈیا پر دونوں کے تعلقات سے متعلق نئی بحث شروع ہو گئی۔
شہزادی بیٹریس اور ایڈوارڈو میپیلی موزی کی پہلی ملاقات 2018 میں ہوئی تھی۔ دونوں نے اگلے برس منگنی کا اعلان کیا اور 2020 میں شادی کے بندھن میں بندھ گئے، جس کے بعد ان کے خاندان میں مزید خوشیاں آئیں۔
ایڈوارڈو کے پہلے بیٹے کرسٹوفر وولف کے علاوہ اس جوڑے کی دو بیٹیاں بھی ہیں۔ بڑی بیٹی سینا الزبتھ میپیلی موزی 2021 میں پیدا ہوئیں، جبکہ دوسری بیٹی ایتھینا الزبتھ روز میپیلی موزی کی پیدائش 2025 میں ہوئی۔
رواں برس کے آغاز میں بعض غیر مصدقہ رپورٹس میں دعویٰ کیا گیا تھا کہ خاندانی اور کاروباری معاملات کے باعث ایڈوارڈو دباؤ کا شکار ہیں، جس کے بعد ان کی ازدواجی زندگی سے متعلق مختلف قیاس آرائیاں سامنے آنے لگیں۔
بعد ازاں اپریل 2026 میں ایڈوارڈو کے والد الیساندرو میپیلی موزی نے اس معاملے پر براہِ راست تبصرہ کرنے سے گریز کیا اور کہا کہ اس حوالے سے بہتر ہوگا کہ سوالات ان کے بیٹے سے کیے جائیں۔
مزید یہ کہ اس سال شادی کی سالگرہ پر دونوں کی جانب سے سوشل میڈیا پر روایتی مبارک باد یا مشترکہ پوسٹ سامنے نہ آنے کے بعد علیحدگی سے متعلق افواہوں نے مزید زور پکڑا، تاہم یونان سے سامنے آنے والی تازہ تصویر نے ان قیاس آرائیوں پر ایک بار پھر سوالات کھڑے کر دیے ہیں۔