ریاض: سعودی عرب کی قیادت میں قائم اتحادی افواج نے دعویٰ کیا ہے کہ یمن کے حوثی گروپ کی جانب سے ریاض کے علاقے کی طرف بھیجا گیا کروز میزائل سعودی فضائی دفاعی نظام نے ہدف تک پہنچنے سے پہلے ہی تباہ کردیا۔
اتحادی افواج کے ترجمان کرنل ترکی المالکی نے سماجی رابطے کی ویب سائٹ ایکس پر جاری بیان میں واقعے کی تفصیلات بتاتے ہوئے کہا کہ حوثی گروپ نے ریاض کے علاقے کو نشانہ بنانے کی غرض سے کروز میزائل داغا تھا، تاہم سعودی دفاعی نظام نے بروقت کارروائی کرتے ہوئے اس خطرے کو ناکام بنا دیا۔
ترجمان کے مطابق فضائی دفاعی یونٹس نے میزائل کی نشاندہی کے بعد اسے فضا ہی میں روک لیا اور اس طرح اسے اپنے ممکنہ ہدف تک پہنچنے سے پہلے تباہ کردیا گیا۔
اتحادی افواج کی جانب سے جاری بیان میں میزائل کی تباہی کی تصدیق تو کی گئی، تاہم اس کے ممکنہ ہدف، واقعے کے مقام اور کسی ممکنہ مالی یا جانی نقصان کے حوالے سے مزید معلومات فراہم نہیں کی گئیں۔
دوسری جانب اس واقعے پر تاحال حوثی گروپ کا باضابطہ مؤقف سامنے نہیں آیا۔ اسی طرح میزائل حملے اور اسے تباہ کیے جانے کے دعوے کی آزاد ذرائع سے بھی تصدیق دستیاب نہیں ہے۔
واقعے کے بعد سعودی عرب کے فضائی دفاعی نظام کی کارروائی سے متعلق تفصیلات سامنے آئی ہیں، تاہم حملے کی نوعیت اور اس کے پس منظر کے بارے میں مزید معلومات کا انتظار ہے