سوئٹزرلینڈ میں بلابنگ کا نیا ریکارڈ، کھلاڑی 92.58 فٹ بلند اچھال دیا گیا
برونن، سوئٹزرلینڈ: سوئٹزرلینڈ میں بلابنگ کے ایک حیران کن مظاہرے کے دوران نئی بلند ترین چھلانگ کا ریکارڈ قائم کرلیا گیا، جہاں ایک کھلاڑی کو پانی پر موجود بڑے ایئر بیگ کی مدد سے 92.58 فٹ کی بلندی تک ہوا میں اچھالا گیا۔
یہ غیر معمولی کارنامہ سوئس شہر برونن، شوائز میں انجام دیا گیا، جہاں سوئس کھلاڑی لوک سیگینٹلر، جرمن لینارٹ فلورکزاک اور امریکی ٹرسٹان کوہن نے ایئر بیگ پر ایک ساتھ چھلانگ لگا کر روبن سٹینر کو ہوا میں بلند کیا۔
اس سرگرمی کو ’بلابنگ‘ کہا جاتا ہے، جس میں ایک بڑے ہوا بھرے بیگ پر افراد مخصوص انداز میں چھلانگ لگاتے ہیں اور اس کے نتیجے میں دوسرے شخص کو زبردست قوت کے ساتھ ہوا میں اچھالا جاتا ہے۔
روبن سٹینر نے نیا ریکارڈ قائم کردیا
روبن سٹینر نے اس کوشش کے دوران 92.58 فٹ کی بلندی حاصل کرکے بلابنگ میں نئی تاریخ رقم کردی۔ اس سے قبل اس کھیل میں بلند ترین چھلانگ کا گنیز ورلڈ ریکارڈ 72 فٹ 2.14 انچ تھا، جو 2012 میں قائم کیا گیا تھا۔
نئے ریکارڈ نے سابقہ بلندی کو نمایاں فرق سے پیچھے چھوڑ دیا۔
بلابنگ سے متعلق سرگرمیوں کا انتظام کرنے والے ایڈرین بومن کے مطابق روبن سٹینر تقریباً چار سال قبل ایک ایونٹ میں پہلی مرتبہ اس کھیل کا حصہ بنے تھے۔ پہلی ہی کوشش کے بعد انہوں نے اس سرگرمی میں غیر معمولی دلچسپی ظاہر کی۔
ایڈرین بومن کے مطابق وقت کے ساتھ روبن نے بلابنگ کے مختلف ایونٹس میں باقاعدگی سے شرکت شروع کردی، جہاں ان کی کارکردگی سے اندازہ ہوا کہ وہ اس کھیل کے لیے خاص صلاحیت رکھتے ہیں۔
عالمی ریکارڈ کی کوشش کیسے سامنے آئی؟
منتظمین کے مطابق روبن کی مسلسل شرکت اور بہتر ہوتی کارکردگی کے بعد ان کے ساتھ بلابنگ کا نیا عالمی ریکارڈ قائم کرنے کا منصوبہ بنایا گیا۔
کامیاب کوشش کے نتیجے میں روبن سٹینر نے 92.58 فٹ کی بلندی حاصل کی اور 2012 میں قائم کیے گئے سابقہ ریکارڈ کو توڑ دیا۔
بلابنگ کے اس منفرد مظاہرے نے نہ صرف کھیل سے وابستہ افراد بلکہ سوشل میڈیا صارفین کی بھی توجہ حاصل کرلی ہے، جہاں بلند ترین چھلانگ کی ویڈیوز اور تصاویر تیزی سے شیئر کی جارہی ہیں۔