برطانیہ: سنڈی کا روپ دھارے 10 افراد کی ریکارڈ ساز دوڑ
برطانیہ کے ایک رننگ کلب کے 10 اراکین نے منفرد انداز میں ایک ہی سنڈی نما لباس پہن کر ہاف میراتھن مکمل کی اور گنیز ورلڈ ریکارڈ میں اپنا نام درج کرانے کی کوشش کی۔
ٹٹبری رننگ کلب کے اراکین نے ڈربی میں ہونے والی راماتھون ہاف میراتھن میں تقریباً 60 فٹ لمبا سنڈی نما لباس پہن کر حصہ لیا۔ یہ منفرد لباس بچوں کی کھیلنے والی سرنگوں (پلے ٹنلز) کے مختلف حصوں کو جوڑ کر تیار کیا گیا تھا۔
کلب کے رکن کریگ روبسن نے بتایا کہ ٹیم کو مقابلے سے پہلے مشترکہ پریکٹس کا زیادہ موقع نہیں ملا، جس کی وجہ سے یہ چیلنج خاصا مشکل ثابت ہوا۔
ان کے مطابق اتنے بڑے لباس میں تمام شرکا کی رفتار اور توازن برقرار رکھنا ایک بڑا انتظامی امتحان تھا، تاہم ٹیم نے بہترین ہم آہنگی اور باہمی تعاون کا مظاہرہ کرتے ہوئے دوڑ کامیابی سے مکمل کر لی۔
ٹیم نے ہاف میراتھن 2 گھنٹے، 8 منٹ اور 51 سیکنڈ میں مکمل کی، جس کے بعد گنیز ورلڈ ریکارڈز میں 10 افراد کے ایک ہی مشترکہ لباس میں تیز ترین ہاف میراتھن مکمل کرنے کے نئے ریکارڈ کے لیے درخواست جمع کرا دی۔
فی الحال گنیز ورلڈ ریکارڈز میں اس نوعیت کے کارنامے کے لیے کوئی باضابطہ زمرہ موجود نہیں، تاہم درخواست کی منظوری کے بعد اس حوالے سے نئی کیٹیگری متعارف کرائے جانے کا امکان ہے۔
