رحیم یار خان کے کچے کے علاقے میں پاک فوج کا فری میڈیکل کیمپ، 300 سے زائد افراد کا طبی معائنہ
رحیم یار خان: پاک فوج کی جانب سے رحیم یار خان کے کچے کے علاقے میں عوام کو صحت کی سہولیات فراہم کرنے کے لیے مفت طبی کیمپ لگایا گیا، جہاں تین سو سے زائد افراد کو علاج معالجے اور طبی مشاورت کی سہولت فراہم کی گئی۔
کیمپ میں علاقے کے مختلف دیہات سے تعلق رکھنے والے مردوں، خواتین، بچوں اور بزرگوں نے شرکت کی۔ اس موقع پر مستحق افراد کا مفت طبی معائنہ کیا گیا اور مریضوں کو ان کی طبی ضروریات کے مطابق ادویات بھی فراہم کی گئیں۔
طبی کیمپ میں موجود ماہر عملے نے مریضوں کی صحت سے متعلق شکایات کا جائزہ لیا اور انہیں مختلف بیماریوں سے بچاؤ، احتیاطی تدابیر اور صحت مند زندگی گزارنے کے حوالے سے مفید مشورے دیے۔
دور دراز اور کچے کے علاقوں میں طبی سہولیات تک محدود رسائی کے پیش نظر اس اقدام سے مقامی آبادی کو اپنے علاقے میں ہی بنیادی طبی خدمات حاصل کرنے کا موقع ملا۔ کیمپ میں آنے والے افراد نے مفت معائنے، ادویات اور طبی رہنمائی کی سہولت سے فائدہ اٹھایا۔
کیمپ سے مستفید ہونے والے شہریوں نے اس اقدام کو سراہتے ہوئے کہا کہ دور افتادہ علاقوں میں ایسے طبی مراکز کا انعقاد مقامی آبادی کے لیے سہولت کا باعث بنتا ہے۔ ان کے مطابق پاک فوج کی جانب سے عوامی خدمت کے لیے طبی کیمپ لگانے سے ایسے افراد کو بھی علاج معالجے کی سہولت میسر آتی ہے جو مختلف وجوہات کی بنا پر بڑے اسپتالوں تک نہیں پہنچ سکتے۔
اہلِ علاقہ نے متعلقہ حکام سے مطالبہ کیا کہ رحیم یار خان کے کچے کے دیگر علاقوں میں بھی اس نوعیت کے مفت طبی کیمپس منعقد کیے جائیں تاکہ زیادہ سے زیادہ افراد کو بنیادی صحت کی سہولیات ان کی دہلیز پر فراہم کی جا سکیں۔
واضح رہے کہ اس طبی کیمپ میں تین سو سے زائد افراد کا مفت معائنہ کیا گیا، جبکہ مریضوں کو ضروری ادویات اور طبی مشاورت بھی فراہم کی گئی۔