لاہور: سہ ملکی کرکٹ سیریز کے پانچویں مقابلے میں سری لنکا نے پاکستان کو شکست دے کر فائنل کے لیے کوالیفائی کرلیا۔ پاکستانی ٹیم پہلے بیٹنگ کرتے ہوئے 110 رنز پر ڈھیر ہوگئی، جس کے جواب میں سری لنکا نے مطلوبہ ٹارگٹ صرف2 وکٹیں کھو کر حاصل کرلیا۔ پاکستان اس سے پہلے ہی فائنل میں اپنی جگہ یقینی بنا چکا تھا۔
پاکستانی بیٹنگ لائن مشکلات کا شکار
لاہور میں کھیلے گئے میچ میں سری لنکن کپتان نے ٹاس جیت کر پہلے فیلڈنگ کا انتخاب کیا۔ ان کا یہ فیصلہ درست ثابت ہوا اور سری لنکن بولرز نے ابتدا ہی سے پاکستانی بلے بازوں کو دباؤ میں رکھا۔
پاکستان کی جانب سے بابر اعظم 29 رنز بنا کر نمایاں رہے، تاہم وہ ٹیم کو مشکلات سے نکالنے میں کامیاب نہ ہوسکے۔ فخر زمان پانچ، معاذ صداقت آٹھ، سعد بیگ پانچ اور سلمان علی آغا نو رنز بنا کر آؤٹ ہوئے۔
شاداب خان بھی صرف دو رنز بنا سکے۔ وہ امپائر کے فیصلے کے خلاف ریویو لینے کے خواہش مند تھے، لیکن پاکستان کے پاس ریویو دستیاب نہ ہونے کے باعث انہیں میدان چھوڑنا پڑا۔
حسن نواز نے سترہ اور عرفات منہاس نے دس رنز اسکور کیے، جبکہ حارث رؤف ایک رن بنا سکے۔ کپتان شاہین شاہ آفریدی پندرہ رنز بنانے کے بعد آؤٹ ہوگئے اور یوں پاکستانی اننگز ایک سو دس رنز پر ختم ہوگئی۔
دلشان مدھوشنکا کی شاندار بولنگ
سری لنکا کی کامیابی میں دلشان مدھوشنکا نے اہم کردار ادا کیا۔ انہوں نے بہترین لائن اور لینتھ کے ساتھ بولنگ کرتے ہوئے 34 رنز دے کر پانچ پاکستانی کھلاڑیوں کو آؤٹ کیا۔ یہ ان کے کیریئر کی بہترین بولنگ کارکردگی رہی۔
سہان آراچیگے نے2 وکٹیں حاصل کرکے پاکستانی بیٹنگ کو مزید نقصان پہنچایا، جبکہ اسیتھا فرنینڈو، ایشان ملنگا اور دونیتھ ویلالاگے نے 1،1 کھلاڑی کو آؤٹ کیا۔
سری لنکن بولرز کی مؤثر کارکردگی کے باعث پاکستان کی ٹیم مقررہ 50 اوورز بھی مکمل نہ کرسکی اور ایک معمولی مجموعے تک محدود رہی۔
کامندو مینڈس کی ناقابل شکست نصف سنچری
111 رنز کے ہدف کے تعاقب میں سری لنکا نے پراعتماد انداز میں بیٹنگ کا آغاز کیا۔ پاکستانی بولرز حریف ٹیم کو بڑے دباؤ میں لانے میں ناکام رہے اور سری لنکن بیٹرز نے ہدف آسانی سے حاصل کرلیا۔