عام طور پر لوگوں کو دوسروں کے معاملات میں غیر ضروری دلچسپی لینے سے گریز کا مشورہ دیا جاتا ہے، تاہم کولمبیا کی 67 سالہ خاتون مریم نے محلے کی سرگرمیوں پر نظر رکھنے کی عادت کو ہی کمائی کا ذریعہ بنا لیا۔ خاتون کا دعویٰ ہے کہ اس منفرد کام سے حاصل ہونے والی آمدنی سے وہ دو گھر خریدنے میں کامیاب ہو چکی ہیں۔
مریم روزانہ صبح اپنے ہاتھ میں نوٹ بک لیے گھر کے باہر بیٹھتی ہیں اور اردگرد ہونے والی سرگرمیوں کا مشاہدہ کرتی ہیں۔ محلے میں کون کس سے مل رہا ہے، کون کہاں جا رہا ہے اور کس معاملے پر بات چیت ہو رہی ہے، وہ ان معلومات کو باقاعدگی سے اپنی نوٹ بک میں درج کرتی ہیں۔
بعد ازاں محلے سے متعلق یہ معلومات ان افراد تک پہنچائی جاتی ہیں جو ان میں دلچسپی رکھتے ہیں، اور یہی کام اب مریم کے لیے آمدنی کا ایک ذریعہ بن چکا ہے۔
مریم نے مختلف انٹرویوز میں بتایا کہ کئی برسوں تک رقم جمع کرنے کے ساتھ ساتھ اپنے اردگرد کے حالات سے باخبر رہنے کی عادت نے انہیں مالی طور پر فائدہ پہنچایا۔ ان کے مطابق محلے میں ہونے والی سرگرمیوں کے بارے میں معلومات حاصل کرنا ان کے معمول کا حصہ بن گیا تھا۔
خاتون کا کہنا ہے کہ اسی کام سے حاصل ہونے والی آمدنی اور مسلسل بچت کے نتیجے میں وہ دو مکانات خریدنے میں کامیاب رہیں۔
مریم کے اس منفرد پیشے کی وجہ سے بعض اوقات ان کے پڑوسیوں کے ساتھ اختلاف بھی پیدا ہو جاتا ہے، تاہم اب تک کسی پڑوسی کی جانب سے ان کے خلاف کوئی قانونی کارروائی نہیں کی گئی۔
مریم کی کہانی اس لحاظ سے بھی دلچسپ ہے کہ جس محلے کی گپ شپ کو عام طور پر لوگ محض تفریح یا وقت گزاری سمجھتے ہیں، انہوں نے اسی معلومات کو مبینہ طور پر باقاعدہ آمدنی میں تبدیل کر لیا اور اپنی اس عادت سے مالی فائدہ حاصل کیا۔