ترسیلاتِ زر میں نمایاں اضافہ، جولائی میں 3.6 ارب ڈالر موصول
اسلام آباد: پاکستان میں کارکنوں کی ترسیلاتِ زر میں نمایاں اضافہ ریکارڈ کیا گیا ہے۔ جولائی 2026 میں بیرون ملک مقیم پاکستانیوں کی جانب سے 3.6 ارب امریکی ڈالر پاکستان بھیجے گئے، جس پر وزیراعظم محمد شہباز شریف نے اوورسیز پاکستانیوں کو خراجِ تحسین پیش کیا ہے۔
دستیاب اعداد و شمار کے مطابق جولائی 2026 میں موصول ہونے والی ترسیلاتِ زر میں سال بہ سال کی بنیاد پر 13 فیصد جبکہ ماہ بہ ماہ کی بنیاد پر 4.5 فیصد اضافہ ریکارڈ ہوا۔
اعداد و شمار کے مطابق جولائی میں ترسیلاتِ زر کا سب سے بڑا حصہ سعودی عرب سے موصول ہوا، جہاں سے پاکستانیوں نے 913.9 ملین ڈالر بھیجے۔ متحدہ عرب امارات سے 737.3 ملین ڈالر، برطانیہ سے 555.5 ملین ڈالر جبکہ امریکا سے 317.2 ملین ڈالر پاکستان منتقل کیے گئے۔
وزیراعظم کا اوورسیز پاکستانیوں کو خراجِ تحسین
وزیراعظم محمد شہباز شریف نے جولائی 2026 میں بیرون ملک مقیم پاکستانیوں کی جانب سے 3.6 ارب ڈالر کی ترسیلاتِ زر بھیجے جانے پر اطمینان کا اظہار کیا ہے۔
وزیراعظم نے کہا کہ جولائی میں سمندر پار پاکستانیوں کی ترسیلاتِ زر میں سال بہ سال 13 فیصد اضافہ انتہائی حوصلہ افزا ہے۔ ان کے مطابق ماہ بہ ماہ بنیاد پر بھی ترسیلاتِ زر میں 4.5 فیصد اضافہ ہوا، جو ملکی معیشت کے لیے خوش آئند پیش رفت ہے۔
شہباز شریف نے کہا کہ بیرون ملک مقیم پاکستانی ملکی معیشت کے استحکام اور ترقی میں مسلسل اہم کردار ادا کر رہے ہیں۔ ترسیلاتِ زر ملک کے زرمبادلہ کے ذخائر کو سہارا دینے کے ساتھ ساتھ معاشی سرگرمیوں میں بھی اہم کردار ادا کرتی ہیں۔
انہوں نے اوورسیز پاکستانیوں کے کردار کو سراہتے ہوئے کہا کہ بیرون ملک مقیم پاکستانی قومی معاشی دھارے کا اہم حصہ ہیں اور وہ ترسیلاتِ زر کے ذریعے ملک کی معیشت میں مسلسل اچھا کردار ادا کر رہے ہیں۔
وزیراعظم نے بیرون ملک مقیم پاکستانیوں کا شکریہ ادا کرتے ہوئے ان کی خدمات کو قابلِ تحسین قرار دیا اور کہا کہ وطن سے دور رہتے ہوئے بھی پاکستانی اپنے ملک کی معشیت میں اضافے میں اپنا حصہ ڈال رہے ہیں۔
سعودی عرب سے سب سے زیادہ ترسیلاتِ زر
جولائی 2026 کے اعداد و شمار میں خلیجی ملک سعودی عرب پاکستانی ترسیلاتِ زر کا سب سے بڑا ذریعہ رہا۔ سعودی عرب سے نو سو تیرا اعشاریہ نو ملین ڈالر موصول ہوئے۔
اس کے بعد متحدہ عرب امارات سے 737.3 ملین ڈالر، برطانیہ سے 555.5 ملین ڈالر اور امریکا سے 317.2 ملین ڈالر پاکستان منتقل ہوئے۔
ترسیلاتِ زر میں مسلسل اضافہ پاکستانی معیشت کے لیے اہم قرار دیا جا رہا ہے، خصوصاً ایسے وقت میں جب ملک کو زرمبادلہ کے استحکام اور بیرونی ادائیگیوں کے دباؤ سے نمٹنے کے لیے بیرون ملک سے آنے والی رقوم کی ضرورت ہے۔
اوورسیز پاکستانی ملکی معیشت کا اہم حصہ
بیرون ملک مقیم پاکستانی طویل عرصے سے ملکی معیشت میں اہم کردار ادا کر رہے ہیں۔ ان کی جانب سے بھیجی جانے والی ترسیلاتِ زر لاکھوں خاندانوں کی مالی ضروریات پوری کرنے کے ساتھ ملک کے معاشی نظام کو بھی سہارا دیتی ہیں۔
جولائی 2026 میں ترسیلاتِ زر میں سالانہ اور ماہانہ دونوں بنیادوں پر بڑھوتی اس بات کی نشاندہی کرتا ہے کہ اورسیز مقیم پاکستانیوں کی جانب سے پاکستان رقم بھیجنے کا رجحان برقرار ہے۔
حکومت کی جانب سے اوورسیز پاکستانیوں کی سہولت اور قانونی ذرائع سے رقوم کی منتقلی کی حوصلہ افزائی کو بھی ترسیلاتِ زر میں اضافے کے لیے اہم قرار دیا جاتا ہے۔