• اکتوبر 26, 2020

جوڈیشل انکوائری کمیشن نے سانحہ اے پی ایس کو سکیورٹی کی ناکامی قرار دے دیا

اسلام آباد:جوڈیشل انکوائری کمیشن نے سانحہ اے پی ایس کو سکیورٹی کی ناکامی قرار دے دیا۔ رپورٹ میں کہا گیا ہے کہ دھماکوں اور شدید فائرنگ میں سکیورٹی گارڈز جمود کا شکار تھے، دہشتگرد سکول کے عقب سے بغیر کسی مزاحمت داخل ہوئے، سکیورٹی گارڈز نے مزاحمت کی ہوتی تو شاید جانی نقصان اتنا نہ ہوتا۔ جوڈیشل انکوائری کمیشن کی رپورٹ میں مزید کہا گیا غداری سے سکیورٹی پر سمجھوتہ ہوا اور دہشتگردوں کا منصوبہ کامیاب ہوا، اپنا ہی خون غداری کر جائے تو نتائج بہت سنگین ہوتے ہیں، کوئی ایجنسی ایسے حملوں کا تدارک نہیں کر سکتی بالخصوص جب دشمن اندر سے ہو، سانحہ اے پی ایس نے فوج کی کامیابیوں کو پس پشت ڈالا۔ اس سے قبل سپریم کورٹ کی جانب سے سانحہ آرمی پبلک سکول کی رپورٹ پبلک کرنے کا حکم دیا گیا تھا۔ عدالت نے ذمہ داروں کے خلاف سخت کارروائی کی بھی ہدایت کی۔ آرمی پبلک سکول کے شہدا کے والدین عدالت میں پیش ہوئے اور کہا سپریم کورٹ اوپر والوں کو پکڑے، نیچے سب ٹھیک ہو جائے گا، ہم چاہتے ہیں کسی اور کے بچوں کیساتھ ایسا نہ ہو، منصوبہ بندی کیساتھ بچوں کو ایک ہی ہال میں جمع کیا گیا، یہ واقعہ دہشتگردی نہیں، بلکہ ٹارگٹ کلنگ تھا۔ اٹارنی جنرل نے سپریم کورٹ میں انکوائری کمیشن رپورٹ پر جواب جمع کرایا اور کہا واقعہ میں ذمہ دار افراد کیخلاف ہر ممکن کارروائی کی جا رہی ہے۔ جس پر چیف جسٹس نے کہا اٹارنی جنرل صاحب ! اوپر سے کارروائی کا آغاز کریں، ذمہ داران کیخلاف سخت کارروائی کریں تاکہ مستقبل میں ایسے واقعات سے بچ سکیں، انکوائری کمیشن رپورٹ، حکومتی جواب کی کاپی والدین کو فراہم کریں۔ جسٹس اعجازالاحسن نے کہا یہ پوری قوم کا دکھ ہے۔ سپریم کورٹ نے امان اللہ کنرانی کو عدالتی معاون مقرر کر دیا۔ چیف جسٹس گلزار احمد نے ریمارکس دیئے کہ بڑے لوگوں کے خلاف کاروائی نہیں کی جاتی، ہمارے ملک کا المیہ رہا ہر بڑے سانحہ کا ذمہ دار چھوٹے عملے کو ٹھہرا کر فارغ کر دیا، بڑے لوگوں کیخلاف کارروائی نہیں کی جاتی، جب عوام محفوظ نہیں تو اتنا بڑا ملک اور نظام کیوں چلا رہے ہیں ؟ انکوائری کمیشن کی رپورٹ اور اس پر وفاق کا جواب پبلک کیا جائے، حکومت کمیشن رپورٹ پر لائحہ عمل بنائے۔ چیف جسٹس نے 16 دسمبر کو آرمی پبلک سکول کے شہدا کے والدین کی دعائیہ تقریب میں شرکت کی دعوت قبول کرلی۔ سپریم کورٹ نے کیس کی سماعت ایک ماہ کیلئے ملتوی کر دی۔

0 Reviews

Write a Review

Read Previous

عمران خان نیب کے ذریعے شہباز شریف کو کیوں گرفتار کرانا چاہتے ہیں؟ترجمان مسلم لیگ ن مریم اورنگزیب

Read Next

A1tv Headlines 02 PM | 25 th September 2020

Leave a Reply

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے