• جنوری 21, 2022

جسٹس عمر عطا بندیال کی بطورِ چیف جسٹس تعیناتی کی منظوری

اسلام آباد: سپریم کورٹ کے جسٹس عمر عطا بندیال کی بطورِ چیف جسٹس آف پاکستان تعیناتی کی منظوری دیدی گئی۔

صدر مملکت ڈاکٹر عارف علوی نے جسٹس عمر عطاء بندیال کی تعیناتی کی منظوری دی۔ صدر نے تعیناتی آئین کے آرٹیکل 175 اے کے تحت کی، یہ تعیناتی 2 فروری 2022ء سے ہو گی۔

 یاد رہے کہ چیف جسٹس گلزاراحمد یکم فروری 2022 کو ریٹائر ہو جائیں گے۔ اس وقت جسٹس عمر عطا بندیال سپریم کورٹ کے سینئر ترین جج ہیں۔

جسٹس عمر عطا بندیال 17 ستمبر 1958ء کو لاہور میں پیدا ہوئے، انہوں نے ابتدائی تعلیم کوہاٹ، راولپنڈی اور پشاور میں حاصل کرنے کے بعد کولمبیا یونیورسٹی امریکا سے گریجویشن کیا۔ کیمبرج یونیورسٹی کے لنکن اِن سے بیرسٹر کی سند حاصل کی۔ 1983ء میں لاہور ہائی کورٹ اور کچھ برسوں بعد سپریم کورٹ کے وکیل کی حیثیت سے درج ہوئے۔

جسٹس عمر عطاء بندیال نے 4 دسمبر 2004ء کو لاہور ہائی کورٹ کے جج کی حیثیت سے حلف اُٹھایا لیکن نومبر 2007ء میں انہوں نے سابق فوجی حکمراں پرویز مشرف کے عبوری آئینی حکم نامے (پی سی او) کے تحت حلف اُٹھانے سے انکار کر دیا تھا۔ بعدازاں وہ دو سال کے لئے لاہور ہائی کورٹ کے چیف جسٹس بھی رہے۔

جون 2014ء میں ان کو سپریم کورٹ کا جج بنایا گیا۔ اپنے اعلیٰ عدالتوں میں منصب قاضی کی ذمہ داریاں نبھاتے ہوئے جسٹس بندیال نے اہم مقدمات کے فیصلے دیئے۔

سپریم کورٹ کی ویب سائٹ کے مطابق جسٹس گلزار احمد نے 21 دسمبر 2019ء کو جسٹس ثاقب نثار کی جگہ چیف جسٹس کا منصب سنبھالا تھا۔ جسٹس بندیال کے منصب کی میعاد مکمل ہونے پر جسٹس قاضی فائز عیسیٰ ان کی جگہ لیں گے۔ ان کی چیف جسٹس کے لئے میعاد 25 اکتوبر 2024ء تک ہوگی۔

جسٹس مقبول باقر اور جسٹس مظہر عالم خان چیف جسٹس بنے بغیر ہی عدالت عظمیٰ سے ریٹائر ہو جائیں گے۔

0 Reviews

Write a Review

Read Previous

چند دن کی وزارتِ عظمی کی خاطر نشانِ عبرت بن جانا گھاٹے کا سودا ہے: مریم

Read Next

وزیراعظم سے ملاقات کیلئے وقت نہ ملنے پر چودھری سالک حسین ناراض

Leave a Reply

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے